الصفحة الرئيسية › ثقافة

ثقافة عَزيزْ ثَايِرْ ماهوش Sympathique - بقلم السينمائي مرْوان المؤدَّب

الثّاير روحْ الشّهيد وصورتَهْ

الثّايِرْ لُونْ الْعَلَمْ كِي مَالْ بَانِتْ دُورْتَهْ

ونجُومْ بوڨَرْعونْ وسط الْڨَمْحْ

مِنْعوا خْزِين الغازي في مَطْمورتَهْ،

الثّاير عروڨْ الدّمْ في خدود بلاد

كي تكالْبِتْ العباد على نَحْرِتْها

كي ثارْ هزّت راسها وعرِّتْ وْشام الْعِزْ في جبْهِِتْها

وتناثروا الثّوّار لْسَايِنْ نارْ

وتْراسْموا نَوَّارْ في مْحَرْمِتْهَا،

الثَّاير صهيل الخيلْ وُسْط اللِّيلْ

يْخَلّي البْلاد تفيق مِنْ غَبْنِتْهَا

نَسِيمْ عْليل يهِزّ يميلْ

مِنْ هَزْتُو الأشْجارْ تِرْشِڨْ الأرْضْ زَرِّيعِتْهَا

الثَّاير قصيدة حُب تخلّي الڨلْب يشوف الدّرب وسط ظلام

والأمطار تنزِلْ عايْمَهْ تداوي جفاف العام من غُزْرتها

الثّايِر عَزيز وغالي نجوم ليالي

ضوِّت جبينْ بلادنا فْ محنتها

صوتو عالي يِزْهِرْ يلالي

ويِتْجَمّعوا الإمّالي

ويورّثوا لَأَولادهم عشڨِتْها

الثّاير روحْ الشّهيد وصورتَهْا

الثّايِرْ لُونْ الْعَلَمْ كِي مَالْ بَانِتْ دُورْتَهْ

ونجُومْ بوڨَرْعونْ وسط الْڨَمْحْ

مِنْعوا خْزِين الغازي في مَطْمورتَهْ.

 

بقلم السينمائي مرْوان المؤدَّب